هچ کس گل خان نصیر بوت نکنت !


People's Poet of Balochistan, Mir Gul Khan Nasir.

پــدا ماؤں پـدا جیل و انت و زمزیر

پدا ما آتکگ اوں گوں توپک و تیر

پـــدا مـاتــی وَتــن بــجــار لوٹـیــت

چه بـچاں تـَنـگهیں و دُتـــگاں هِـیـر

اے گلگالیں و بلوچستان ءِ پر مارشتیں و مهرواریں شائر ، میر گلخان نصیر ءِ پنجاه و شست سال پیش ءِ گال اتنت که بلوچستان و بلوچانی هیرانی تمن زوراکانی بوٹاں ، ٹینکاں و بمبانی چیرا سُچاں و هوناں چگین ات . بلوچ سرمچار ، په وتی ماتی گلزمین ءَ سر و ساه ءَ شرتاں جتگ و په وتن ءِ آزاتی ءَ چه جان و مال سر گوئست انت .


گل خان ماں همے سیاهیں دَؤر ، وتی زیند ءَ ، 29 سال زوراکیں انگریز و رندا پاکستان ءِ سَه سِندیں جیل و بنداں په وتی گلزمین بلوچستان ءِ آزاتی ءِ هاترا بندیگ بیت . بلے گل خان وتی سر جهل نکرت و آئی ءِ « تریں زبان » چُپ نبوت .


آئی ءِ گال مردمانی دل ءِ هبر ، و راستیں وٹکیں گال اتنت .


باز کس په وتی مزن پیشدارگ ءَ گل خان ءِ برزیں و درپشوکیں شائری ءَ ایر جت و آئی ءِ گال اش « پوتاری »( شعار ) ءِ نام دات . آهاں اے راستی و گواچن ءَ چیر دیگ ءِ جهد ءَ کرت که آهانی جند ءِ دلگوش ، شکلیں بلوچی زبان ءِ نیمگ ءَ هما گل خان ءِ آشوبی و پر زانت و پر مارشتیں شئیرانی برکت ءَ بوتگ.


مرچی سی و سئے سال ءِ کچ انت که میرگلخان نصیر وتی مدامی وابجاه ءَ وپتگ و واب انت . آئی ءِ گرئند و گروکیں زبان بند انت و مرچی اے راستی ءَ هچ کس چیردات نکنت که بلوچستان ءِ آشوب و زرمبش وتی برزتریں هد و سیمسراں رستگ و هر روچ بلوچ ورنا ، چک ، زال و پیرمردانی لاشاں ، رستریں پاکستان و ایران ءِ پئؤجیانی دست ءَ شهید و پٹ و کوهاں دَؤر دَیَگ بنت ؛ یاں بلوچ ءِ شهر ، کلگ و هلکانی لوگ و دَواراں ، آس مانداراں ، سوچاں و بیران کنان انت ، یاں بلوچ ورناییں جهدکار ، زانتکاراں و راجی سراں تولگی دُزاں و چست کناں و چیریں بندیگجاهاں سه سندیں ازابانی چیرا کشنت ، یاں تیرگوار کن انت و یاں دار درنجنت . بلے نیست هنچیں زبانے که بلوچ ءِ اے سیاهیں و دلسندیں جاوراں ، گلخان ءِ داب ءَ آس و گرئندیں گالاں به کماهیت و دژمنانی دل ءَ نوش و ریش بکنت و ورنایانی راجی جزبه ءَ هزار سر برز ببارت .

https://www.facebook.com/MirGulKhanNasir/?fref=ts


اے آسین جاورانی اندر ءَ همے جُست پاد کیت که پرچا ماں اے دَؤر ءَ په بلوچ و بلوچستان ءَ دگه گلخان نصیرے درنکپت و دیما نیتک و بے شک تاں گل خان ءِ دربرگ مزنیں راهے بلوچاں دیما انت و بے آئی ءِ دَؤبَرگ و گوں آئی ءِ دربرگ الم هم ، کس گلخان نصیر بوت نکنت !


پرچا که وهد پیشداشتگ که سدی باز گوئستگ و شتگ انت ، بلے نه په یونان ءِ مردم دگه هومرے در کپت و نه په پارسیاں دگه پردوسی یے و الم انت که گلخان ءِ مَٹ ودی مبیت !






#PeoplesPoetofBalochistanMirGulKhanNasir #MirGulKhanNasir #Balochestan #Baluch #Baluchipoems #Baloch #FreedomforBaluchistan #Balochistan #HistoryofBaluchistan #AmericanBaluchcouncil #Baluchistanandtheworld #Baluchistan #بلوچ #بلوچیشائران #میرگلخاننصیر

Recent News