بلوچستــــانءِ هیروشیمـــا

 

بیست ءُ هشـت تاں سی اُم ماهِ مئـی  سال ۱۹۹۸ ءَ پاکستان ءِ بلوچ دژمنیں پَئوج ءِ اتمی تیم  ماں بلوچ گلزمین ءِ چاگی ءُ راسکوه ءَ هما رستـری کت که تاں زمین ءُ زمان هست اَنت آ انسان دژمنیں زوالکاریءِ کارپد گار نه بنت۰ آ وتی ابلیسی بمباں دور چه گجرات ءُ پنجاپ ءَ ماں بلوچ گلزمیـن سرا تِست کتنت تانکه بلـوچ راج گیشتــرتاوانبار به بیـت۰ 

 پاکستانی پئوج ءِ اَتمی تیم  هما سئيں روچاںی درگت ءَ  پنچ اتمی بمب ماں راسکوه ءِ  دلءَ  چَکّاس اِت ءُ تراکینت۰ چار بمب که سرجم ءَ چل و پنچ کیلو تُن اتنت بیست ءُ هشت مئی ءِ شومیں روچ ءَ راسکوه ءُ چاگی ءُ بلوچ گلزمین ءَ جکسینت ءُ پنچمی بمب که هژده کیلو تُـن اَت ماه مئی ءِ سی اُمی  روچءَ  ماں گنجیں راسکوهءَ تِست کنگ بوت۰

بمبانی چَکّاسگ ءَ رند  رستریں پئوجی گل کت ءُ پنجاپ جشن گپت بلئے بلــوچ سوگیگ بوتنت۰  پاکستان ءِ اتمی بمباں هـزاراں انسـان ءُ دگه سادارانی زند ءُ جان سلامتی جاوراں هما دمانءَ  تباه کـت ءُ تن تن بلوچانی لآپی چکاں هم پنجاب ءِ بمبانی رادیواکتیوی زهـرءِ آماچ بوتنت۰

رند چه بمبانی تِست کنگءَ آ دمگءِ مـردم وڑوڑیں پوستی بیماری ءُ لاپرچ ءُ شانَگ، سردرد، چمءِ بیماری،  جاندرد، کوری، پُپّ ءُ گٹگانی بیماری، شومک ( کینسر)ءِ آماچ انت۰  بمبانی توار ءُ گوات ءُ لوڈ ءُ جهان سوچیں رادیواکتیوی پُلگ ءُ دنزءَ  هر سادارے ءَ که سر بوت هما دمان ءَ مرت انت یا که سر سوچ ءُ بیمار بوتنت ءُ رندترا ازاب کوش بوتنت۰

بلوچستـان ءِ راسکـوه ءِ  هنار ءُ هنگور ءُ هالگ ءِ درچکانی هنڈالاں هم ستک ءُ مرت انت ءُ اگاں چه دور چه بمبانی ترکَّگ ءِ جاهے جاهے هنگت ءَ بر ءُ نیبگ دینت بلئے  ورگی نهنت۰ گوستگیں دؤر شاهد انت که راسکوه ءِ گـٹ ءُ گَـر ءُ سنداتانی نیبگ بے درور اتنت۰

آ دمگ ءِ جرّ ءُ داراں، گون ءُ کسور، آرچن ءُ گیشر، گواتام ءُ پلوش، ڈولوک ءُ کریچان هم سُتک انت ءُ هشـک بوتنت۰ راسکوه ءِ چمگانی آپ رادیواکتیوی بوتنت ءُ ورگی نهنت۰ اگاں انسان یا دگه سادارے گلمبے چه آ آپءَ به وارت  گڑا دیر یا زوت بیمار بیت ءُ گڈسرا چه همے سَوَب ءَ مِریت۰ 

چاگی ءُ راسکوه ءِ هشترءُ گوک ءُ آسک، کوهی پاچن ءُ گورانڈ، بز ءُ میش ءُ هـرءَ روباه ءُ مم ءُ تولگ ءُ مار ءُ زیم ءُ کُلیڑءُ داب دابیں بالی مرگاں هم چه  پاکستان ءِ اتمی بمبانی سَوَب ءَ مُرت انت یا که مرکی بوتنت۰

 اتمی بمبانی همے زوالکاری ءُ بربادی یانی سوب ءَ پنجاپ ءِ پئوج وتی ابلیسی بمباں ماں پنجاپ ءَ تِست نه کتنـت۰ آ بلوچ دژمنیں لَدیگ په پنجاپیانی آسراتی ءَ مئے لوگ ءُ مئے ڈیه ءُ هنکیں آس مانداشتـگ ءُ راسکـوه اِش مُـدامی ویـران کــت۰ 

آزات ءُ آباد بـــات گنجيـــــں بلـوچستــــان

پروشـت ءُ پروش باتنت ايران ءُ پاکستــان

محمــد کريم بلــوچ

ماه مئی ۲۰۱۷  

Please reload

Recent News

Please reload

American Baluch Council © 2018

  • Facebook - American-baloch Council
  • Twitter - American-Baluch council
  • YouTube - American-Baluch Council